Pou ane lekòl sa a, Lekòl Leta nan Miami-Dade County pral lanse yon seri sèvis ete ki pi konplè sou plizyè dimansyon distri lekòl la poko janm ofri elèv yo ak fanmi yo.

Distri nou an repanse lekòl ete a pou prepare yon pwogram ki pral solid sou plan akademik, amizan ak angajan, ki pral satisfè bezwen san parèy elèv nou yo pou diminye lakin pèt aprantisaj anpil nan yo te ka sibi nan etid yo. Pandan "Ete 305", ki pral fèt kòmanse 28 jen rive 30 jiyè 2021, elèv yo ap kapab eksplore, fè eksperyans epi briye grasa yon varyete opsyon k ap depase nivo akademik yo epi, ki gen ladan yo aprantisaj sosyo-emosyonèl, sèvis sante mantal, aktivite fizik, pwogram atistik, opòtinite estaj ak plis toujou.

Malgre nou te pran yon seri dispozisyon depi Mas 2020 pou diminye enpak pandemi an fè sou pèfòmans akademik ak byennèt sosyal emosyonèl elèv yo, kanpous nou yo te louvri depi nan otòn 2020, lekòl ete a pral bay yon opòtinite san parèy pou kontinye pwosesis rekiperasyon akademik lan epi kòmanse ane lekòl 2021-2022 a.

Kisa fanmi yo ka espere ete sa a?

Ane sa a, pou premye fwa, distri nou an ap fè patenarya ak The Children’s Trust, ki se pi gwo òganizatè kan nan mwa ete e ki gen plis pase 300 andwa atravè kominote a. Si pitit ou a ale nan younn nan kan sa yo, li pral resevwa sipò akademik nan men pwofesè yo ki nan distri a atravè yon sistèm enstriksyon an gwoup redui. Grasa apwòch tou nèf sa a, distri nou an pral rive jwenn timoun yo kote yo ye a epi adrese bezwen akademik yo pou asire yon tranzisyon fasil nan nouvo ane lekòl la.

Elèv ki nan tout nivo ane eskolè yo ap gen aksè ak “E-Learning Toolbox” (Bwat Zouti Aprantisaj sou Entènèt) yon pakèt aplikasyon ak jwèt sou entènèt ki disponib nenpòt ki lè, nenpòt ki kote nan pòtal elèv la. Resous sa yo pral pèmèt elèv yo pratike epi aplike sa yo te aprann pandan ane lekòl la epi eksplore nouvo konesans yo.

Pou elèv ki nan klas matènèl jiska klas 5yèm ane, distri a ap ofri kan dete ki rele ‘Smart Start Elementary Camps’. Eksperyans edikasyon sou plizyè dimansyon sa a ap bay aprantisaj pratik ak aprantisaj nan plizyè disiplin tankou Lekti, Matematik, Syans ak Etid Sosyal epi adrese aprantisaj sosyo-emosyonèl. Elèv sa yo ap kapab patisipe tou nan kan pou aprann lang etranje ki disponib nan tout lekòl elemantè yo. Elèv ki nan “Pre-K” (klas matènèl) jiska klas 3yèm ane ap resevwa yon sak lekòl ki gen resous ak aktivite pou ale lakay pou asire yo ka kontinye aprann pandan ete a.

Pou elèv lekòl mwayen yo, nou pral ofri Kan Dete pou adolesan ki rele “Smart Start Teen Summer Camps” yon pwogram ete sou plizyè disiplin ki pral pwopoze yon seri aktivite pratik, amizan ak angajman epi yon aprantisaj baze sou pwojè. Elèv sa yo ap kapab patisipe tou nan yo “Academy of Future Entrepreneurs Summer Camp” (Akademi Kan Ete pou Fiti Antreprenè yo), kote yo pral gen opòtinite pou yo transfòme tan lib yo pou yo kòmanse angaje yo nan aktivite biznis. Anplis de sa, elèv lekòl mwayen ki te echwe nan kèk klas, kapab refè jiska de (2) nan klas sa yo pandan ete sa a.

Elèv lekòl segondè yo ap gen opòtinite pou yo patisipe nan yon estaj peye nan “Summer Youth Internship Program” (Pwogram Estaj Pou Jèn Yo), enskri nan “Career Technical Education Summer Programs” (Pwogram Ansèyman Ete Teknik Pwofesyonèl), pran kou (Dual Enrollment Courses) Anwolman Doub, oswa prepare pou evalyasyon enpòtan tankou Aljèb I Egzamen Final oswa ACT ak SAT lakay yo menm lè yo ale nan pòtal elèv yo. Elèv lekòl segondè ki te echwe klas kapab tou refè kredi sa yo nan sezon ete a de (2) fason, nan lekòl la ak sou entènèt.

Nou ta renmen wè elèv nou yo tounen nan kanpous lekòl yo nan tout distri a pou yon pwogram ete trè espesyal ki pral pwovoke kiryozite entelektyèl yo ak ba yo opòtinite pou yo sosyalize ak lòt timoun nan yon anviwònman ki an sekirite e ki ankourajan. Lekòl yo se plas espesyal kote elèv yo jwenn konesans akademik ak aprann valè debaz pandan y ap fòje relasyon ki dire tout lavi yo epi ki fè nou yon pi bon kominote.

Pou plis enfòmasyon sou Ete 305 oswa pou enskri, tanpri vizite summer305.dadeschools.net oswa kontakte lekòl pitit ou a.