Senatè Marco Rubio Eksprime Sipò Li Pou Apèl Sipèentandan Carvalho Pou Lekòl Segondè Miami Edison Ak Miami Central

SENATÈ MARCO RUBIO EKSPRIME SIPÒ LI POU APÈL SIPÈENTANDAN CARVALHO POU LEKÒL SEGONDÈ MIAMI EDISON AK MIAMI CENTRAL

Nan yon deklarasyon sou videyo, Senatè Rubio eksprime sipò li pou apèl Sipèentandan Alberto M. Carvalho nan mande Konsèy Edikasyon Eta a pou l kenbe Lekòl Segondè Miami Edison ak Miami Central ouvè.

Senatè Rubio di, “Bon, nou tout kwè nan pwogrè edikasyonèl, ak bi lwa a se pou l mezire kòman lekòl yo ap amelyore… Pwoblèm nan avèk toude, Edison ak Miami Central, sèke lekòl sa yo kòmanse yon kote ki pa nan tablo a. Yo te ba anpil nan tablo a nan sa ki konsène kote yo soti. Yo fè gwo pwogrè, e mwen swete eta a ap ba yo yon chans pou yo kontinye fè pwogrè sa a e pa entewonp li nan chanje fason yo jere lekòl yo. Mwen kwè toude, Edison ak Miami Central, merite yon chans pou yo kontinye egzekite plan sa a ki jiska prezan montre amelyorasyon ki prèske yon mirak.”

Sipèentandan Carvalho te ekprime gwo apresyasyon li genyen pou sipò Senatè Rubio, lè li di, “Pandan kominote nou an mete tèt yo ansanm pou kenbe lekòl segondè Miami Edison ak Miami Central ouvè, nou konstate toude pati yo sipòte kòz la. Mwen trè touche dèske enkyetid sou avni ak byennèt elèv ki nan lekòl ki pi frajil nou yo depase limit pati politik yo.”

Sipèentandan Lekòl yo Alberto M. Carvalho pral fè yon prezantasyon konvenkan konsènan avni Lekòl Elemantè Holmes ak lekòl segondè Miami Edison ak Miami Central nan reyinyon Konsèy Edikasyon Florid nan Tampa, madi 19 jiyè. Baze sou Plan Responsablite Espesyal Florid ak Lwa Florid 1008.33, lekòl sa yo ap fè fas a konsekans grav kounye a paske yo pat soti nan kondisyon “Entèvansyon”, malgre yo kontinye ap amelyore e fè nòt responsablite “C”.

Carvalho di, “Fèmen lekòl nou yo se pa yon opsyon… Ekip nou an prale Tampa pou fè yon prezantasyon global sou rezon ki fè Konsèy Edikasyon Florid ta dwe sipòte apèl nou yo. Mwen sèlman favorize kontinyasyon plan amelyorasyon aktyèl nou an avèk kèk amelyorasyon pou adrese kote nou bese.”

Malgre estanda pi konplèks ane dènye yo, ansanm ak yon egzamen matematik sou òdinatè e yon pi wo nivo konpetans nan redaksyon, yo pwojte Miami Edison ak Miami Central ap resevwa yon nòt responsablite nan pèfòmans “D” an 2011. Lekòl Elemantè Holmes kenbe yon nòt “C” pandan twazan konsekitif e yo ka apwouve apèl li a. Yo te remèt Depatman Edikasyon lèt apèl pou twa lekòl yo 5 jiyè 2011.

Selon limit li, Konsèy Edikasyon Eta a gen otorite pou l rekomande kat opsyon pou chak lekòl: 1) fèmen lekòl la; 2) fè l tounen yon lekòl “charter”; 3) anplwaye yon konpayi jesyon prive pou jere lekòl la; oubyen 4) apwouve apèl lekòl la e pèmèt distri a kontinye egzekite pwosesis amelyorasyon aktyèl li a.

Nan Lekòl Segondè Miami Edison, yo pwojte nivo gradyasyon an ap ogmante a 72 pousan pou ane pase, ki se yon ogmantasyon 23 pwen de sèlman dezan desa. Depi 2003, kapasite nan lekti amelyore 10 pwen soti 5 rive 15 pousan; kapasite nan matematik amelyore 28 pwen soti 13 pousan rive 41 pousan; e kapasite nan syans amelyore soti 10 pousan rive 22 pousan depi 2006-2007. Anplis, pousantaj elèv ki patisipe nan kou akselere ogmante de 26 pwen pousantaj nan dezan soti 19 pousan rive 45 pousan. Nan dezan, pousantaj elèv yo konsidere ki prepare pou lekti kolèj ogmante a 32 pwen pousantaj soti 38 pousan rive 70 pousan.
Nan Lekòl Segondè Miami Central, depi yo te idantifye li kòm yon lekòl ki bezwen entèvansyon an 2008, kapasite nan lekti amelyore 3 pousan e kapasite nan matematik amelyore 9 pousan. Depi 2003, kapasite nan matematik amelyore 24 pwen soti 23 pousan rive 47 pousan. Non sèlman gen plis elèv ki patisipe nan kou akselere nan Lekòl Segondè Miami Central men yo ap avanse nan nivo ki pi wo. An 2008-2009, sèlman 11 pousan elèv ki te enskri nan kou akselere te pase. An 2010-2011, yo atann 69 pousan elèv pase nan kou sa yo. Yo pwojte tou preparasyon pou lekti kolèj ogmante soti 56 pousan an 2009-2010 rive 77 pousan an 2010-2011.