Lekòl Leta Miami-Dade Ap Selebre Jounen Aprantisaj Dijital, 1ye Fevriye

MIAMI – Lekòl Leta Miami-Dade pral selebre “Digital Learning Day (DLD)” (Jounen Aprantisaj Dijital) mèkredi pou sipòte efò san rete Distri a ap fè pou bay opòtinite aprantisaj dijital ak ansèyman inovatif.

Sipèentandan Lekòl yo Alberto M. Carvalho di, “ Chak jou nan Miami-Dade se Jounen Aprantisaj Dijital... N ap efase dezè dijital yo nan kominote nou an atravè enstriksyon teknoloji inovatif e atravè efò pou konsyantize moun, tankou kanpay “e-Rate” (sou Entènèt) nou an pou ranmase lajan pou ranfòse teknoloji nan lekòl ak salklas. Nan Miami-Dade, n ap kreye yon anviwònman kote moun ka aprann nenpòt lè, nenpòt kote.”

DLD se dènye evènman nan yon kanpay sansibilizasyon nasyonal ki dire tout ane a pou amelyore ansèyman ak aprantisaj pou tout timoun. Plizyè santèn distri lekòl, plizyè milye pwofesè, ak plis pase yon milyon elèv atravè peyi a pral ankouraje itilizasyon inovatif teknoloji nan eseye yon bagay nouvo, ekspoze siksè, lanse aprantisaj ki baze sou pwojè, oubyen konsantre sou fason zouti dijital ka ede amelyore rezilta elèv.

Lekòl, pwofesè, ak elèv nan Miami-Dade ap sipòte kanpay nasyonal la nan patisipe nan yon seri aktivite ki gen ladan sa ki anba yo:

Patisipe nan Reyinyon Kominotè Nasyonal (sou Entènèt)
Fè yon chas votou sou Entènèt atravè lekòl la
Kreye pwojè ak prezantasyon dijital pou elèv
Prezante aktivite dijital nan tan pou bay istwa
Kreye istwa dijital nan itilize pwogram animasyon
Ale nan pwomnad (sou Entènèt)
Enkòpore “eBooks” (Liv sou Entènèt) nan resous dijital ak leson yo
Enkòpore teknoloji entèraktif ak resous dijital nan leson atravè tout matyè debaz yo
Kreye pwojè videyo elèv pwodui

Yo te lanse Kanpay Finansman E-Rate “Mete Entènèt San Fil nan Salklas” la pou konekte tout lekòl atravè “Wi-Fi” avan fen ane lekòl 2012-2013 la. Y ap matche fon yo ranmase yo avèk dola federal a yon to $100 pou chak $10 yo ranmase lokalman, jisrive $70 milyon. Kanpay la ap fini 20 mas 2012.

Pou kontribye sou Entènèt nan pwogram E-rate la, vizite www.helpdadeschools.com klike “donate button” (bouton donasyon) an, e mande pou yo bay fon an nan pwogram “Give Kids the World – A World of Technology” (Bay Timoun Mond lan – Yon Mond Teknoloji).