Yo Plase Lekòl Leta Miami-Dade County Sou 4yèm Lis Onè Anyèl Distri AP® “College Board” La E Yo Nonmen Li Meyè Distri Plasman Avanse Pou Ane A

YO PLASE LEKÒL LETA MIAMI-DADE COUNTY SOU 4YÈM LIS ONÈ ANYÈL DISTRI AP® “COLLEGE BOARD” LA E YO NONMEN LI MEYÈ DISTRI PLASMAN AVANSE POU ANE A

Yo rekonèt distri a pou ogmantasyon aksè ak pèfòmans, patikilyèman pou elèv minoritè ki tradisyonèlman pa jwenn ase sèvis

Miami, Fla. — Lekòl Leta Miami-Dade County se youn nan 477 distri lekòl “College Board” (Komisyon Kolèj) la ap onore nan Etazini ak Kanada avèk plasman sou 4yèm Lis Onè Anyèl Distri AP® pou ogmantasyon aksè pou kou AP® pandan li ap, anmenmtan, kenbe oubyen ogmante pousantaj elèv ki ap resevwa nòt 3 oubyen plis nan Egzamen AP yo. Rive nan nivo objektif sa yo endike distri a ap idantifye avèk siksè elèv ki motive, akademikman prepare, e ki gen plis chans pou yo benefisye de travay kou AP rijid yo. Ou ka jwenn 4yèm Lis Onè Anyèl Distri AP a okonplè si w klike la a.

Nan Lis Onè AP a, yo te chwazi twa Meyè Distri AP pou Ane a, youn pou chak kategori gwosè popilasyon distri (piti, mwayèn, gwo), pou akonplisman yo nan ekite ak ekselans. Pami lekòl ki gen gwo popilasyon yo, Lekòl Leta Miami-Dade County te akonpli pi gwo ogmantasyon nan patisipasyon ak pèfòmans AP pase nenpòt lòt distri nan Etazini nan twa dènye ane akademik yo. Siksè sa yo nan ogmantasyon aksè ak pèfòmans AP patikilyèman, gen anpil valè pami popilasyon elèv distri a ki tradisyonèlman pa jwenn ase sèvis.

Sipèentandan Miami-Dade Alberto M. Carvalho di, “Resevwa Prim Plasman Avanse Distri a souliyen enpòtans pou edike elèv nou yo pou yo vin lidè nan ekonomi global nou an alavni… Siksè Miami-Dade yo se egzanp poukisa li enpòtan pou ofri yon gwo varyete opòtinite pou elèv yo patisipe nan kou Plasman Avanse ki rijid, san yo pa gen okenn laperèz enstitisyonèl pou rezilta pèfòmans yo. Ouvri aksè pou ofri kou AP ranfòse elèv pou yo trase pwòp chemen yo nan yon mond ki mande pou etabli ladrès global ki sofistike. Elèv AP nou yo ak pwofesè yo deja leve defi entèlektyèl sa a, moun te panse ki te enfranchisab yon lè, e yo fè l tounen yon reyalite.

Ogmante patisipasyon elèv nan AP de senk pousan anyèlman;
Ogmante pousantaj elèv AP ki resevwa 3 oubyen plis nan omwen yon Egzamen AP de senk pousan anyèlman, avèk 46 pousan elèv AP ki fè nòt 3 oubyen plis an 2013; e
Ogmante pousantaj elèv minoritè AP ki tradisyonèlman pa jwenn ase sèvis ki resevwa 3 oubyen plis nan omwen yon Egzamen AP, de sis pousan anyèlman — yon ogmantasyon 1,561 elèv ane dènye.

Trevor Packer, vis prezidan kad siperyè AP ak Enstriksyon nan “College Board” la di, “Nou felisite edikatè devwe nan Lekòl Leta Miami-Dade County dèske yo ouvri aksè nan AP e opòtinite bay pi gwo popilasyon elèv li a… Prim sa a ap pwobableman enspire lòt edikatè atravè peyi a ki kwè tou yon popilasyon elèv ki pi divès pare pou kalite rijidite ki pral prepare yo pou siksè nan kolèj.”

Ede plis elèv aprann nan yon nivo ki pi wo e resevwa nòt AP ki pi wo se yon objektif pou tout manm komite AP a, soti nan pwofesè AP pase sou administratè distri e lekòl rive sou pwofesè kolèj. Anpil distri ap eksprimante yon varyete inisyativ ak estrateji pou detèmine kòman elaji aksè e anmenmtan amelyore pèfòmans elèv.

An 2013, plis pase 3,300 kolèj ak inivèsite toupatou nan lemond te resevwa nòt AP pou kredi kolèj, plasman avanse e/oubyen konsiderasyon nan pwosesis admisyon an, avèk plizyè kolèj ak inivèsite nan Etazini ki ofri kredi nan youn oubyen plis sijè pou kalifye pou nòt AP.

Nan kèlke mwa, yo ap pwograme yon evènman medya pou onore Miami-Dade kòm chwa “College Board” la pou Meyè Distri Plasman Avanse pou Ane a. Yo ap anonse lòt de (2) distri gayan yo — yon mwayèn ak yon piti — anvan lontan.

Apwopo Lekòl Leta Miami-Dade County
Lekòl Miami-Dade County se katriyèm pi gwo sistèm lekòl nan Amerik avèk yon anwolman 350,000 elèv divès ki soti nan plis pase 100 peyi, li ofri pwogram edikasyonèl inovatif nan 435 lekòl li yo, ki gen ladan lekòl elemantè, mwayen, segondè ak altènatif, sant espesyalize e vokasyonèl. Elèv ak fanmi yo gen yon vwa aktif nan chwazi opòtinite aprantisaj ki nouri ekselans akademik, chemen lekòl-pou-karyè ak nan mond reyèl la.

Apwopo Pwogram Plasman Avanse®
“Advanced Placement Program® (AP®)” (Pwogram Plasman Avanse) pèmèt elèv ki vle e ki prepare akademikman pou yo pousuiv etid nan nivo kolèj — avèk opòtinite pou yo resevwa kredi kolèj, plasman avanse oubyen toude — pandan yo toujou nan lekòl segondè. Atravè kou AP nan 34 sijè, chak kilmine nan yon egzamen rijid, elèv yo aprann panse kritik, konstwi agiman ki solid, e wè plizyè aspè nan yon pwoblèm — ladrès ki prepare yo pou kolèj e aprè. Pran kou AP demontre ofisye admisyon nan kolèj elèv yo te chèche kourikoulòm ki pi rijid ki disponib pou yo, e rechèch endike elèv ki resevwa nòt 3 oubyen plis nan yon Egzamen AP ap tipikman reyalize pi gwo siksè akademik nan kolèj e y ap gen plis chans resevwa yon diplòm kolèj pase elèv ki pa elèvAP.

Pwofesè kèk nan meyè kolèj ak inivèsite nan peyi a evalye e apwouve silabis pwofesè AP yo, e se pwofesè kolèj ak pwofesè eksperimante ki devlope e korije egzamen AP yo. Majorite kolèj ak inivèsite katran nan Etazini bay kredi, plasman avanse, oubyen toude, sou baz nòt reyisit nan Egzamen AP yo – plis pase 3,600 enstitisyon atravè lemond resevwa anyèlman nòt AP. Nan dis dènye ane yo, patisipasyon nan Pwogram AP plis pase double e gradye ki fè siksè nan Egzamen AP yo prèske double. An me 2013, 2.2 milyon elèv ki reprezante 18,920 lekòl atravè lemond, toude, piblik e sa ki pa piblik, te pran apwoksimativman kat milyon Egzamen AP.

Apwopo Komisyon Kolèj la
Komisyon Kolèj la se yon òganizasyon ki fèt sou baz yon misyon, ki pa la pou pwofi e ki konekte elèv avèk siksè nan kolèj ak opòtinite. Yo te kreye Komisyon Kolèj la, ki fonde an 1900, pou ogmante aksè nan edikasyon siperyè. Jodi a, asosyasyon sa a depase 6,000 manm nan meyè enstitisyon edikasyonèl nan lemond e li pran angajman pou pwomote ekselans ak ekite nan edikasyon. Chak ane, Komisyon Kolèj la ede plis pase sèt milyon elèv prepare tèt yo pou yon tranzisyon reyisi nan kolèj atravè pwogram ak sèvis, nan preparasyon pou kolèj e siksè nan kolèj — ki gen ladan SAT® ak Pwogram Plasman Avanse®. Òganizasyon an ap sèvi tou kominote edikasyon an atravè rechèch ak defans nan non elèv, edikatè, ak lekòl. Pou plis enfòmasyon, vizite www.collegeboard.org.