‘Miami-Dade County Public Schools (M-DCPS)’ (Lekòl Leta Miami-Dade County) se yon defansè pou elèv li yo ak fanmi yo. Depi kòmansman pandemi an, sante ak byennèt elèv yo ak anplwaye yo te yon priyorite pou distri lekòl la. M-DCPS te aktif nan bay sèvis ak resous adisyonèl pou mete ann aplikasyon mezi prevansyon pou konbat COVID-19.

Avèk vakans prentan an ki ap apwoche ak pandemi COVID-19 la ki ap pèsiste, nou kontinye asosye avèk kominote nou an pou adrese tout defi, ki parèt aklè e sa ki kache, sou COVID-19. Kòm yon prekosyon preliminè, nou ankouraje fanmi yo evite vwayaje aletranje pandan vakans prentan k ap vini an. Si fanmi yo dwe vwayaje, yo dwe konfòme yo ak nouvo direktiv Sant pou Kontwòl ak Prevansyon Maladi (CDC) sou vwayaj nan avyon. Janvye pase a, ‘CDC’ te anonse yon lòd ki egzije pou tout pasaje ki ap rive Ozetazini soti nan yon peyi etranje pou yo teste pa plis pase twa jou anvan depa yo. Vwayajè yo dwe prezante yon rezilta negatif oswa dokiman bay konpayi avyon an ki endike yo refè nan COVID-19 anvan yo monte avyon an. Pasaje ki pa kapab bay rezilta negatif pap ka rantre nan peyi a.

Nou konseye w kolabore nan efò nou yo pou ankouraje pratik prevantif COVID-19 yo kontinye tankou mete mask oubyen kouvèti figi, kenbe distans fizik 6-pye ak lave men souvan. Ann angaje nou pou nou travay ansanm pou kenbe kominote nou an sekirite. Nou kapab e n ap pèsevere.

Epidemi COVID-19 la transfòme kominote nou an, sosyete a, ak mond lan. Divès chanjman nou te oblije fè pou fè fas ak lavi nou chak jou te afekte paran ak timoun yo. Pou elèv nou yo, enpak la te manifeste atravè difikilte avèk etid yo, prezans ak yon mank angajman nan klas. Sa ki te pi grav la se te move efè sou sante sosyo-emosyonèl yo, tankou santiman izolasyon, laperèz, anksyete, ak estrès. Paran ak gadyen yo t ap fè fas avèk kèk nan menm sitiyasyon ki lakoz estrès yo, anplis presyon ki vin ajoute sou satisfaksyon bezwen fanmi yo. Pami difikilte paran ap fè fas nan kontèks COVID-19 la genyen: pèt travay, diminisyon nan salè, ogmantasyon responsablite pou paran pran swen e kontwole pitit yo, divòs/ separasyon, pwoblèm lojman, ak mank resous esansyèl yo. Travayè Sante “Miami-Dade County Public Schools (M-DCPS)” (Lekòl Leta Miami-Dade County) yo se kle nan ede konbat menas sa yo ki, pi devan, ka afekte yon anviwònman aprantisaj ki gen sekirite.

Mas se Mwa Travay Sosyal, e 7-13 Mas se Semèn Travay Sosyal nan Lekòl. Nou menm nan M-DCPS, nou rekonèt enpòtans pwofesyon an ak gwo wòl travayè sosyal yo jwe nan lekòl nou yo. Travay sosyal nan lekòl yo reprezante yon domèn pratik espesyalize anndan varyete ki gen nan powofesyon an. Tout travayè sosyal nan lekòl M-DCPS yo gen diplòm metriz nan travay sosyal, yo gen sètifikasyon “Florida Department of Education (FLDOE)” (Depatmtan Edikasyon Florid) e apeprè yon tyè ladan yo lisansye kòm travayè sosyal klinik. Yo pote konesans ak ladrès espesyal nan sistèm lekòl la e nan lekòl y ap sèvi yo. Travayè sosyal yo fè entèvyou pou paran e yo fè evalyasyon sikolojik ak sosyal ansanm ak evalyasyon konpòtman, yo bay sipò sante mantal lè gen kriz, yo fasilite konsiltasyon avèk pwofesè, paran e yo ofri elèv yo konsèy ak terapi endividyèlman e an gwoup.

Lè COVID-19 te fòse fèmti lekòl fizik yo nan Prentan ki sot pase a, administratè ak edikatè M-DCPS yo te eksprime enkyetid yo konsènan mank angajman elèv yo ansanm ak enkapasite yo te genyen pou atenn fanmi yo. Travayè sosyal nan lekòl Distri a te jwe yon wòl enpòtan nan re-etabli lyen ant lekòl nou yo, fwaye yo, ak kominote a, pou ede pwomote siksè akademik pandan y ap pwomote rezistans lakay fanmi yo ak elèv yo.

Nan kòmansman ane lekòl 2020- 2021 an, demand ki te genyen pou sipò elèv ak fanmi te pouse M-DCPS kreye yon metòd sou entènèt pou lekòl yo te ka adrese demand asistans bay travayè sosyal lekòl yo. Sistèm sa a pèmèt administratè lekòl yo kreye rekòmandasyon pou sèvis avèk plis efikasite. Depi nou te adpote sistèm sa a, travayè sosyal nan lekòl yo resevwa plis pase 7,000 rekòmandasyon ki gen rapò ak evalyasyon elèv, depistaj inisyal pou elèv, konsèy endividyèl, ak asistans sèvis sosyal pou fanmi. Travayè sosyal nan lekòl yo elaji sipò bay lekòl yo tou nan ede tcheke byennèt elèv ki dekonekte avèk lekòl yo, sa ki gen plizyè absans ak sa ki pran abitid absan san pèmisyon.

Travayè sosyal nan lekòl M-DCPS yo aprann anpil sou rezon ki kache dèyè difikilte elèv ak fanmi yo ap fè fas. Yo bay sipò, konsèy, resous ak rekòmandasyon pou asire elèv yo re-angaje yo avèk siksè nan lekòl e nan etid yo. Ansuit, chak ekip divès disiplin nan lekòl yo itilize vizyon sa yo pou kreye plan entèvansyon global e pratik ansanm ak sipò pou asire yo elèv yo retounen nan menm nivo yo te ye avan

COVID-19 oubyen depase nivo sa a.

Sipò travay sosyal nan lekòl yo bay nan prevansyon ak entèvansyon mande bonjan estanda etik, jenewozite, pwofesyonalis, ak moral ansanm ak priyorite nan defann timoun ki pi vilnerab nan lekòl nou yo ak fanmi yo. Ansanm avèk lekòl nou yo e moun ki enterese yo, travayè sosyal nan lekòl yo santi yo ka vin tounen motè pou gwo chanjman lakay elèv yo e amelyore chans pou siksè nan anviwònman akademik la e pi lwen toujou.

Pou plis enfòmasyon, vizite sit entènèt Distri a pou Pwogram Travay Sosyal Nan Lekòl Yo nan http://sswp.dadeschools.net/, rele 786-451-2401 oubyen vizite sit entènèt “Miami-Dade County Association of School Social Workers” (Sendika Travayè Sosyal Nan Lekòl Miami-Dade County Yo) https://doren0le.wixsite.com/m-dcassw.

“The Foundation for New Educational Initiatives (FNEI)” (Fondasyon pou Nouvo Inisyativ nan Edikasyon), òganize 6yèm defi Anyèl 5K Sipèentandan an ki te fèt vityèlman ane sa a. Patisipan yo te ka kouvri distans yo nenpòt kote ak nenpòt lè ant 6 mas rive 13 mas 2021, suiv pwogrè yo epi fini aktivite yo grasa aplikasyon ‘RaceJoy’ la sou aparèy mobil yo. Se yon enspirasyon pou wè fòs yon kominote ki reyini pou sipòte lekòl piblik yo. Nou pa ka rete tann yo retounen ansanm ane pwochèn 5 mas 2022 pou evènman anyèl sa a, kous pou edikasyon, pandan n ap selebre fyète vil Miami nou an sou ‘#305Day’ (Jounen 305).