Nan de (2) dènye ane ki sot pase yo, pandemi global COVID-19 la te vrèman afekte sosyete nou an nan fason nou pa t ap janm imajine. Pandan n ap soti nan pi gwo trajedi sante nan epòk nou an, nou twouve nou, atravè tout peyi a ak nan kominote nou an, devan yon kriz nan edikasyon avèk dimansyon istorik. Done yo klè. Enpak pandemi an sou akonplisman akademik elèv yo lakoz yo fè gwo bak atravè tout nivo klas yo, an reyalite yo rive nan de (2) chif.

Eka ki te egziste avan nan sa ki konsène opòtinite ak akonplisman elèv yo kontinye ap elaji. Jèn elèv yo, ki te toujou frajil e ki te gen difikilte pou aprann avan pandemi an, se yo ki pi afekte. Inegalite yo ap vin pi gran e gen nan yo ki la depi plizyè jenerasyon k ap vin pi konplike toujou. Pou konplike sitiyasyon enkyetan sa a plis toujou, resamman genyen yon ogmantasyon nan menas blòf, ki lakoz plis distraksyon ki deranje anviwònman edikasyonèl nan lekòl nou yo, e sa mennen nan yon ogmantasyon nan nivo estrès, anksyete, ak absans pami elèv yo. Nou pa gen tan pou n pèdi. Nou dwe konsakre plis tan ak enèji pou lekòl nou yo, nou dwe travay pi di toujou pou n rebati lekòl yo, e kòm rezilta, kominote nou an ap vin pi bon e pi solid. Chak minit ki pase oubyen chak fwa nou distrè se yon lòt opòtinite nou rate, e sa ap afekte jèn nou yo pandan tout lavi yo.

Lè m te vin Sipèentandan “Miami-Dade County Public Schools (M-DCPS)” (Lekòl Leta Miami-Dade County) an 2008, peyi a t ap fè fas ak yon resesyon ekonomik, Eta Florid te menase pou l fèmen nèf lekòl ki pa t ap bay bon pèfòmans, te gen plizyè douzèn lekòl ki t ap fè nòt D oubyen F, e to gradyasyon nou te bloke nan 58 pousan. Lè sa a, nou te konnen nou te dwe pran gwo mezi, nan nivo akademik ak finansye, pou ranvèse dezas ekonomik sa a e mete lekòl nou yo kanpe sou pye yo. Rapidman pou rive an 2020, M-DCPS reyalize yon nòt A, avèk okenn lekòl F pandan twazan youn apre lòt, ak yon to gradyasyon 93 pousan pou lekòl segondè tradisyonèl yo. Sistèm lekòl nou an konnen ki efò sa mande pou leve nivo elèv nou yo, men nou konnen tou nou pa ka fè l poukont nou. Nou bezwen pou kominote nou an kanpe e jwe wòl pa li pandan peryòd difisil sa a.

Pa gen dout nan sa, edikasyon se fondasyon pou siksè e kominote nou an pa ka pwospere e avanse si nou pa asire nou tout elèv resevwa menm opòtinite pou egzèse tout potansyèl yo. Se moman pou nou jwenn nouvo fason pou akselere aprantisaj pou elèv nou yo e ofri yo, fanmi yo, ansanm ak anplwaye nou yo sipò sosyal ak sipò emosyonèl yo vrèman bezwen. Atravè kolaborasyon ak patenarya nou devlope, nou dwe travay ansanm, sipòte elèv nou yo e sipòte youn lòt. Kòm edikatè, paran, ak lidè kominotè, nou tout gen yon wòl nou jwe nan adrese difikilte aprantisaj yo, e nou PA KA tann. Pa gen anyen ki pi enpòtan pase avni timoun nou yo.

Nou dwe rebay elèv nou yo enèji, zouti, ak angajman ankò. Sa mande pou paran yo kontinye patisipe aktivman nan edikasyon pitit yo e asire yo pitit yo ale lekòl chak jou, pandan y ap suiv pwogrè yo. Aktyèlman, tout lekòl M-DCPS yo ofri pwogram anrichisman apre lekòl e pandan vakans la, gen plis pase 130 lekòl ki pral ofri Akademi Ivè, ki gen ladan twazèdtan aprantisaj chak jou. E elèv yo ka toujou itilize resous dijital ki sou pòtal M-DCPS la, tankou ‘iReady’, ‘Reflex Math’, ‘MyOn’ ak ‘Gizmos’. Lekòl yo te kontakte paran timoun ki kapab benefisye sipò akademik adisyonèl sa a pou ba yo enfòmasyon konsènan pwogram ki disponib yo.

Pwojè sa a ap mande tou pou moun ki gen bòn volonte yo – konseye, volontè, patnè nou nan legliz ak sipòtè edikasyon piblik – pou ede timoun nou yo atenn tout potansyèl yo. Mwen pap janm sispann kwè nan elèv Miami-Dade County yo e y ap toujou nan kè mwen. Kèlkeswa koneksyon mwen vin devlope avèk sistèm lekòl sa a, pou mwen, sa se yon bezwen ijan. Mwen ankouraje ou pou w vin jwenn Komisyon Konsèy Lekòl nou an ansanm ak tout ekip M-DCPS la pandan n ap mete bonjan konsantrasyon sou akonplisman ak prezans elèv nou yo. Avni kominote nou an depann de nou tout. Nou te montre rezistans nou pandan pandemi an, e kounye a nou dwe aplike menm rezistans sa a nan pwojè edikasyonèl sa a. Pou aprann kijan ou ka sipòte efò nou yo, kontakte lekòl pitit ou a oubyen voye yon imèl pou nou nan dcpscommunity@dadeschools.net. Si nou travay ansanm, Distri nou an ap vin pi solid pase avan.

“Miami-Dade County Public Schools (M-DCPS)” (Lekòl Leta Miami-Dade County) te kòmanse aksepte aplikasyon pou pwogram Magnet pou ane lekòl 2022-2023 a vandredi 1ye oktòb. Nou ap kontinye aksepte aplikasyon jiska 15 janvye 2022.

Nou ofri plis pase 370 pwogram Magnet pou tout nivo klas yo ki gen ladan kou espesyalize avèk konsantrasyon sou enterè espesyal elèv yo, talan ak abilite yo.

Atravè pwogram Magnet M-DCPS yo, nou prepare elèv yo pou devlope ak briye nan edikasyon apre lekòl segondè ak nan espas travay yo. Pami pwogram ki disponib yo genyen Eksplorasyon Lespas ak Lanmè, ‘Cybersecurity’ (Sekirite sou Entènèt), Envestisman (n ap sèvi avèk tèminal echanj aksyon ‘Bloomberg’ la), Entèlijans Atifisyèl nan Wobotik, Konsepsyon Jwèt ak Animasyon, Medsin, Pwofesyon Enfimyè, Ar Vizyèl ak Pèfòmans, ak Etid Entènasyonal, pou site kèk nan pwogram yo sèlman!

Nou ka antre nan sistèm aplikasyon Magnet la nan miamimagnets.org e li disponib nan plizyè lang. Pou tout dènye enfòmasyon sou pwogram Magnet yo, ou ka ale sou Twitter nan @miamimagnets Pou plis enfòmasyon oswa pou pale ak youn nan anplwaye pwogram Magnet yo, tanpri rele 305-995-1922.