Lekòl Leta Miami-Dade County Fè Seremoni Koupe Riban pou Laboratwa Ar Kilinè nan Miami Beach Senior High School

"Miami-Dade County Public Schools (M-DCPS)" (Lekòl Leta Miami-Dade County) te òganize yon seremoni koupe riban lendi pase nan Lekòl Segondè Miami Beach pou devwale yon Laboratwa Ar Kilinè $2.4 milyon ki fèk renove.

Direktris Administratif Edikasyon Karyè Teknik M-DCPS, Lupe Ferran Diaz di, "Jodi a se vrèman yon jounen kontantman non sèlman pou nou menm nan Distri a, men tou pou kominote a e pi enpòtan toujou pou elèv yo, ki se talan endistri sa a alavni. Li di evènman an enpòtan anpil espesyalman paske li gen 17 an depi li ap anseye nan lekòl la.

Nouvo ekipman laboratwa ar kilinè a gen ladan yon nouvo espas pou chèf kuizin nan anseye ki gen recho agaz, griyaj, fou, yon gri ak kapichon komèsyal pou vantilasyon. Anplis, li gen senk nouvo espas pou elèv yo kuit manje ki gen recho agaz, frijidè anba kontwa a, evye pou preparasyon manje, yon frizè komèsyal, de (2) evye aliminyòm, ansanm ak yon machin pwofesyonèl pou lave veso.

Pou ede nan enstriksyon leson pou aprann kuit manje yo, elèv yo ap genyen tou yon tablo entèlijan ansanm ak yon kamera ak yon sistèm televizyon sikui fèmen pou ansèyman nan zafè kuit  manje.

Saydel Laskar, yon elèv dènye ane nan pwogram Syans Kuizin nan di: “Mwen santi m onore anpil pou dèske m fè pati pwojè ekselan sa a... Mwen kontan pou m jwenn eksperyans nan kuizin ekstrawòdinè sa a anvan mwen gradye epitou mwen pral aprann nan men yon chèf espesyal ki ka anseye mwen e ede m avèk karyè kuit manje mwen alavni”.

Pwogram Ar Kilinè a, ki se yon pati nan lekòl Akademi Jesyon Ospitalite ak Touris la, gen kounye a 170 elèv ki pral benefisye nouvo laboratwa dènye modèl sa a. Se Carivon Construction ki te gen kontra pou fè renovasyon nan kwizin grad pwofesyonèl la. Pwojè sa a se yon patenarya ant M-DCPS ak Chanm Komès Miami Beach la, ki te bay ekipman kuizin yo.

Pwojè bon nan lekòl yo se rezilta apwobasyon votè yo pou Bon Obligasyon Jeneral $1.2 milya dola a an 2012. Nou ap itilize lajan bon yo pou modènize ak konstwi bilding lekòl atravè Distri a, ogmante kapasite lekòl yo pou pran plis elèv, amelyore sekirite nan etablisman yo, e amelyore teknoloji nan tout lekòl yo.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools

Chèf Kuizin Sètifye e Direktè Patrick Syka (agoch) ak Enstriktè Syans Kuizin Rowan Jacobs (adwat) ansanm ak elèv ki enskri nan Akademi Ospitalite ak Touris nan Miami Beach Senior High School pou selebre ouvèti Laboratwa Ar Kilinè lekòl la ki fèk renove.