Lekòl Leta Miami-Dade County Fè Evènman Seremoni Koupe Riban nan Lekòl Charles R. Drew K-8 Center

Manm Komisyon Konsèy Lekòl, Doktè Dorothy Bendross-Mindingall, Direktris Lekòl Sant K-8 Charles R. Drew, Quintera Parris, ofisyèl eli nan konte a, vil la ak rejyon an te rankontre ak elèv yo pou seremoni koupe riban an.

Madi pase "Miami-Dade County Public Schools (M-DCPS)" (Lekòl Leta Miami-Dade County) te fè yon seremoni koupe riban nan Lekòl Charles R. Drew K-8 Center pou selebre inogirasyon pwojè ekspansyon ak renovasyon sa a ki vo apeprè $11.7 milyon dola.

Sipèentandan Rejyon Santral la, Brenda Swain, Manm Komisyon Konsèy Lekòl la Doktè Dorothy Bendross-Mindingall, Direktris Lekòl Charles R. Drew K-8 Center a, Quintera Parris, administratè distri ak lekòl yo ansanm ak pwofesè ak elèv te patisipe nan selebrasyon an.

Madan Parris di, "Nou gen yon nouvo bilding... yon bèl espas… Elèv yo gen tout sa yo bezwen, nan espas dènye kri sa a.”

Lekòl la, ki te bati an 1964, gen sèt bilding ak 658 plas pou elèv. Nouvo bilding twa etaj la ap ranplase ansyen bilding prensipal la ki aje. Trezorye Lekòl Charles R. Drew K-8 la, Adela Bradley, di ansyen elèv ki soti nan epòk ansyen bilding orijinal la santi yo emosyonèl anpil pou renovasyon an.

Li kontinye pou di, "Anpil moun kontinye kondui pase bò lekòl la pandan yo t ap demoli bilding nan epi yo vini yon jou pou mande si yo ka pran kèk souvni sentimantal nan ansyen lekòl la. Sa fè m reyalize bilding sa a se te yon moniman."

Nan premye etaj nouvo bilding prensipal la gen biwo administratif, yon sant resous pou paran ak yon klinik. Dezyèm etaj la gen salklas pou elèv klas twazyèm rive senkyèm ane eskolè ak yon nouvo sant medya epi nan twazyèm etaj la nou gen salklas pou elèv lekòl mwayen yo, kòmanse klas sizyèm ane rive uityèm ane.

Pami amelyorasyon yo fè nan lekòl la genyen yon nouvo sistèm "PA" (anons piblik), ki kouvri tout lekòl la. Ansyen sistèm nan te kouvri sèlman bilding prensipal la, ki vle di anplwaye yo te oblije sèvi avèk aparèy kominikasyon manyèl tankou 'walkie-talkie' pou kominike avèk lòt pati nan lekòl la pou anonse elèv yo lè yo t ap pase pran yo. Sant Medya a gen yon estidyo kote yo pwodui pwogram televizyon e se la elèv yo ka difize enfòmasyon chak jou.

Anplis, kounye a elèv yo gen yon nouvo teren baskètbòl ble, ki se koulè inifòm lekòl la.

Londyn Summerall, yon elèv klas senkyèm ane di, "Bilding lekòl la gen plis espas. Nouvo teren baskètbòl deyò a gran, nou ka jwe plis. Sa fè nou santi nou pare pou aprann epi santi nou byen."

Sa a se premye pati nan yon pwojè ki gen de (2) faz Komisyon Lekòl la te bay konpayi konstriksyon 'Veitia Padron, Inc.,' kòm konpayi ki te inisye pwojè a, sa gen twazan. Nan lòt faz k ap vini an n ap ajoute yon lòt bilding.

Pwojè bon nan lekòl yo se rezilta apwobasyon votè yo pou "General Obligation Bond (GOB)"

(Bon Obligasyon Jeneral) $1.2 milya dola a an 2012. Nou itilize lajan ki soti nan bon an pou amelyore ak bati bilding lekòl nan tout Distri a, ogmante kantite plas pou elèv yo, amelyore sekirite nan lekòl yo, epi ofri amelyorasyon teknolojik nan tout lekòl.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, e sou Facebook nan MiamiSchools.