Pwogram Estaj pou Jèn Pandan Ete a Lanse 10èm Anivèsè Depi L ap Konekte Elèv M-DCPS yo Ak Antrepriz Lokal yo

"The Summer Youth Internship Program (SYIP)" (Pwogram Estaj pou Jèn Pandan Ete a), ki konekte elèv lekòl segondè yo ak plizyè santèn anplwayè pou yo ka jwenn eksperyans travay, te lanse 10èm edisyon pwogram nan lendi a. Nan evènman an te genyen nouvo patnè ki gen potansyèl pou pèmèt elèv fè estaj avèk yo alavni epi nou te ankouraje yo rantre nan pwogram nan. Patisipan yo te tande dirèkteman tou kèk ansyen elèv estajyè yo sou fason yo te benefisye de eksperyans la ak sa yo te aprann yo.

Sipèentandan Lekòl yo Dtè. Jose L. Dotres di, "Pwogram 'SYIP' a ap prezante yon bèl tablo sou ansyen elèv nou yo nan kominote a... Li rasanble nou tout ansanm pou asire elèv yo pa sèlman ap aprann nan lekòl, men tou lokalman nan kominote yo ak nan endistri lokal yo. Lè nou fè koneksyon sa yo, nou kreye yon anviwònman aprantisaj ki enteresan anpil."

Pandan 10 dènye ane yo, 'SYIP' ofri elèv M-DCPS opòtinite pou yo enskri nan yon eksperyans travay peye ki dire senk semèn pandan ete a nan yon varyete domèn. Anplwayè k ap patisipe yo benefisye de sèvis elèv yo san li pa koute yo anyen. Jiskaprezan, anviwon 800 anplwayè gen tan enskri pou jwenn chans pou anboche etidyan estajyè yo e yo prevwa gen anviwon 3,000 etidyan ki pral patisipe nan pwogram nan pandan ete sa a.

Majistra Miami-Dade County, Daniella Levine Cava di, "Pwogram nan pa sèlman bon pou elèv yo, li bon pou òganizasyon yo tou... Nan gouvènman konte nou an, jèn yo pote anpil enèji ak antouzyasm, epi tout anplwaye nou yo vle bay konsèy e ede yo. Se yon eksperyans ki anrichisan anpil pou nou."

M-DCPS ap fè patenarya avèk The Children's Trust, Miami-Dade County, Career Source South Florida, EdFed – Educational Federal Credit Union ak Foundation for New Education Initiatives pou ofri estaj, ki disponib pou elèv depi klas 10èm rive 12èm ane eskolè ki ranpli pwosesis aplikasyon an anvan dat 9 me. Tout nouvo anplwayè yo ak tout ansyen yo dwe enskri sou miamiinterns.org. Antrepriz yo ka anboche jiska 10 estajyè pandan dire pwogram nan.

Prezidan ak Direktè Jeneral Children's Trust la, James R. Haj, fè n konnen, nan konvèsasyon li avèk diferan sektè pandan kèk ane ki sot pase yo, kit se nan domèn swen sante oubyen nan finans, patwon yo toujou souliye difikilte yo genyen paske yo pa ka jwenn talan ki kalifye.

Mesye Haj di, "Avèk pwogram 'SYIP' a, nou kreye yon rezo pou ede devlope talan pandan endistri yo ap grandi epi tou nou kapab evolye... Anplwayè yo gen opòtinite pou yo chwazi pami talan lokal yo, talan nou genyen nan Lekòl Leta Miami-Dade County yo epi yo vrèman pare pou devlope mendèv pou demen an.

Yo plase elèv yo nan divès biwo atravè Konte Miami Dade, biwo veterinè, restoran, konpayi ki fè travay jeni, sant gadri, biwo avoka ak anpil lòt kote ki vrèman enteresan. Bay elèv opòtinite pou eksplore fiti karyè yo pandan y ap touche yon salè e resevwa kredi lekòl segondè se yon lòt bon egzanp sou rezon ki fè M-DCPS se pi bon chwa ou.

Ernesto Korin, yon elèv twazyèm ane segondè nan Miami Coral Park Senior High School, te fè estaj nan konpayi 'Earth Robotics' ete pase a epi li te gen opòtinite pou travay ak pwogram òdinatè sofistike dènye kri nan nivo endistri nan katye jeneral konpayi an.

Korin di, "Mwen te resevwa konsèy ak sijesyon nan men pwofesyonèl ki nan endistri yo sou pwojè ki baze sou syans enfòmatik, sou fason yo pran eleman oubyen teknoloji ki pi piti epi fè yo fonksyone kòm yon sistèm... Ou ka pasyone jan w vle, men toutan w pako fè yon eksperyans pratik, ou pa gen okenn ide de reyalite a. Se yon eksperyans ki san parèy."

Nan ete ane pase, te gen 3,187 elèv ki soti nan 93 lekòl ki te patisipe nan estaj yo avèk 974 anplwayè. M-DCPS ak patnè li yo te envesti $6.25 milyon nan pwogram nan. Tout elèv ki te enskri nan SYIP yo resevwa kredi pou lekòl segondè epi yo ka elijib pou resevwa kredi pou kolèj atravè pwogram anwolman doub avèk Miami-Dade College.

Pou plis enfòmasyon konsènan ‘SYIP’, tanpri rele 305 693-3005 oubyen vizite miamiinterns.org.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oubyen Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools.