Direktis M-DCPS se yon Finalis pou Meyè Direktè pou Ane 2025 la nan Florid

Nan foto a, soti agoch pou rive adwat: Asistan Direktè Lindsey Hopkins Technical College Armando Sosa, Lyezon Andeyo Lokasyon an Tamika Adams, Direktris Chantal G. Osborne, Asistan Direktè Zulay Lezcano, ak Asistan Direktè Jean Claude Saint-Phard ki ap selebre anons Osborne kòm yon finalis pou Meyè Direktè Florid pou Ane 2025 la.

Yo te nonmen Chantal G. Osborne, Direktris Kolèj Teknik Lindsey Hopkins nan "Miami-Dade County Public Schools’ (M-DCPS)" (Lekòl Leta Miami-Dade County), kòm youn nan twa finalis pou prim Meyè Direktè pou Ane 2025 nan Florid.

Rene Mantilla, Asistan Sipèentandan Biwo Edikasyon apre Lekòl Segondè ak Edikasyon Teknik di, "Madan Osborne se san dout yon vrè lidè, yon lidè pasyone... Li reprezante siyifikasyon kolèj apre lekòl segondè, pou angaje kominote a, sektè prive a. Li se yon lidè ektrawòdinè e vrèman yon temwayaj nan sa nou pwodwi isit la nan M-DCPS, ki se pi bon chwa ou."

Ane pase a, Osborne te ranpòte pi gwo onè kòm Meyè Direktè M-DCPS pou Ane a. Pandan 29 dènye ane yo, li te yon edikatris nan Distri a, li te kòmanse kòm yon pwofesè pandan 18 ane anvan li te vin asistan direktris epi answit direktris. Osborne te di moman ki pi memorab nan karyè li se lè li chita sou yon podyòm pandan seremoni gradyasyon epi li ap gade elèv yo ki ap rejwi nan okazyon an.

Osborne di: “Mwen rekonesan anpil, e se yon imilite pou mwen dèske yo rekonèt mwen pou onè estrawòdinè sa a... Mwen pa t ap ka la san èd pwofesè, anplwaye, ak elèv mwen yo. Se yon jwa ekstrèm pou m montre tout òf apre lekòl segondè genyen pou ofri tout kominote nou an nan Miami-Dade.”

Prim Akonplisman Direktè pou Pwogram Lidèchip Eksepsyonèl la te etabli an 1988 pou rekonèt direktè eksepsyonèl ki dirije pwogram pou ogmante pèfòmans elèv, pwomote anviwonman aprantisaj an sekirite e etabli patenarya nan lekòl yo ak kominote yo. Meyè Direktè pou Ane 2025 la pral resevwa yon prim $3,500, alòske de (2) finalis yo pral chak resevwa $1,500. Yo ap anonse gayan an nan yon repa midi apresyasyon nan Champions Gate, FL, 11 avril.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, e sou Facebook nan MiamiSchools.