M-DCPS Devwale Yon Espas Inovasyon nan Palmetto Middle School

Nan foto a, soti agoch pou rive adwat: Sekretè Komite Akèy Miami 2026, Ronald Albert Jr., Tashane Witty, yon elèv klas 6èm ane eskolè, Manm Komite Konsèy Akèy Miami 2026 la, Les Pantin, Espesyalis Anchèf Relasyon Kominotè pou FPL, Darlyne Jean-Charles, Asistan Sipèentandan Daniel Mateo, Direktris Lekòl Mwayen Palmetto Alina Valero, Ofisye Anchèf Akademik Lourdes Diaz, Manadjè Patenarya Fondasyon Playoff Football Inivèsitè Margaret Frank, Sipèentandan Rejyon Sid Rafael Villalobos, Direktris Egzekitif Rejyon Sid la Ana C. Othon, ak elèv 7èm ane Axelle Grueber te patisipe nan seremoni koupe riban Espas Innovation nan Lekòl Mwayen Palmetto.

Semèn pase, “Miami-Dade County Public Schools (M-DCPS)” (Lekòl Leta Miami-Dade County) te òganize yon evènman koupe riban pou devwale yon espas inovasyon yo re-amenaje, ki rich ak teknoloji, nan sant medya lekòl Palmetto Middle School. Nouvo espas la gen ladan kas reyalite vityèl, zòn 'Makerspace' (yon espas pou elèv pataje lide, ekipman, ak konesans), avèk wobotik pou aktivite aprantisaj pratik, ansanm ak nouvo mèb yo mete nan yon espas ki ouvè kote elèv yo ka angaje yo nan aktivite kreyatif an gwoup.

Ofisye Anchèf Akademik Lourdes Diaz di, "Espas inovasyon sa yo pral kontinye evolye ak inove alavni... Elèv yo pral kapab panse, aprann, jwe, eksplore ak rezoud pwoblèm nan yon fason ki elaji fason yo panse ak elaji orizon yo, jodi a ak demen."

Pwojè $2 milyon dola a te finanse grasa yon patenarya ant M-DCPS, "College Football Playoff Foundation" (Fondasyon Faz Eliminatwa Foutbòl Kolèj Ameriken an) ansanm ak "2026 College Football Playoff National Championship Game Host Committee" (Komite Planifikasyon Faz Eliminatwa Chanpyona Nasyonal Foutbòl Kolèj 2026 la).

 15 nan kas reyalite vityèl espas inovasyon an resevwa yo fèt pou ranfòse kourikoulòm matematik ak syans pou elèv yo. Zòn 'Makerspace' la gen ladan non sèlman wobotik, men tou ar ak atizay ansanm ak lòt teknoloji pratik.

Elèv Lekòl Mwayen Palmetto ap teste echantiyon nan twous 'Makerspace' la

Espas Inovasyon an gen ladan tou yon zòn jwèt 'Esports,' (jwèt sou entènèt) avèk uit òdinatè pou elèv yo plonje nan eksperyans jwèt tankou 'Minecraft', lojisyèl pwogramasyon tankou 'Scratch' ak 'Tinkercat,' ki se yon lojisyèl pou enprime an '3D' (3-Dimansyon).

Alina Valero, Direktris Lekòl Mwayen Palmetto di, “Li vrèman enteresan pou nou wè transfòmasyon an... Nou wè ki jan elèv yo itilize zòn 'Makerspace' la ak òdinatè yo. Gen kèk elèv ki pa pran kou wobotik epi ki pa gen aksè a teknoloji sa a, kounye a yo gen aksè a li. Li enpòtan e enteresan."

Nan de (2) pwochen ane yo, patnè nou yo pral re-amenaje yon total 18 espas inovasyon nan lekòl mwayen M-DCPS yo pou satisfè bezwen endividyèl pwofesè ak elèv yo nan domèn sosyal, emosyonèl ak akademik.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools.