M-DCPS Fè Seremoni Koupe Riban Pou Inogire yon Laboratwa Enfòmatik nan Kolèj Tenik D.A. Dorsey

Inogirasyon nouvo laboratwa enfòmatik nan Kolèj Teknik D.A. Dorsey

"Miami-Dade County Public Schools (M-DCPS)" (Lekòl Leta Miami-Dade County), te fè yon seremoni koupe riban nan Kolèj Teknik D.A. Dorsey pou prezante nouvo laboratwa "Computer Systems and Information Technology Lab (CSIT)" (Sistèm Teknoloji Òdinatè ak Enfòmatik) lekòl la. Laboratwa a ekipe avèk òdinatè ki pral pèmèt elèv yo jwenn eksperyans pratik nan domèn enfòmatik.

Sipèentandan Lekòl yo, Dtè. Jose L. Dotres di, "Sa n ap fè a se yon bagay ki pral benefisye pa sèlman elèv ki nan lekòl sa a, men tout kominote a. Se yon laboratwa ki pral ofri elèv nou yo yon eksperyans ki enpòtan e apwopriye, pou yo pare pou demen, pa sèlman pou lavni, e sa gen anpil valè pou nou."

Pami envite ki te patisipe nan seremoni koupe riban an, te gen Madan Mari Tere Rojas, Chèmann Komisyon Konsèy Lekòl la, Dtè. Dorothy Bendross Mindingall, manm Komisyon Konsèy Lekòl la, René Mantilla, Asistan Sipèentandan pou Biwo Edikasyon Teknik ak Karyè aprè Lekòl Segondè, Dtè. Jacoby Watkins, Direktè Kolèj Teknik D.A. Dorsey, patnè nou yo nan sektè endistriyèl la e nan kominote a, anplwaye lekòl la, pwofesè, ak elèv.

Laboratwa a te jwenn finansman gras a don ki soti nan "Florida Workforce Development Capitalization Incentive Grant (CAP)" (Don Avantaj Finansye pou Devlopman Mendèv nan Florid), laboratwa 'CSIT' sa a ogmante opòtinite elèv yo nan edikasyon teknik ak karyè nan sistèm òdinatè ak sistèm enfòmatik. Laboratwa a konsantre sou devlopman mendèv, epi ekipe elèv yo avèk konpetans esansyèl pou yo antre dirèkteman nan mache travay la apre yo fin diplome. Kalite envestisman sa yo demontre poukisa M DCPS rete pi bon chwa pou elèv ki ap chèche fè eksperyans aprantisaj avanse ak chemen karyè ki solid.

Elèv nan Kolèj Teknik D.A. Dorsey ap egzamine disk mayetik yon òdinatè.

Dtè. Jacoby Watkins, Direktè Kolèj Teknik Dorsey a di, "Sa a enteresan anpil. Nou te gen chans pote sistèm teknoloji dènye kri nan nouvo laboratwa enfòmatik nou an. Sa pral fè li pi fasil pou rekrite nouvo elèv pou pwogram 'CSIT' nou an, epi elèv kolèj nou yo ak elèv lekòl segondè ki ap patisipe nan pwogram anwolman doub pou karyè yo kapab itilize l tou."

Mesye Watkins kontinye pou l di kounye a kolèj teknik la pral ouvè pandan aswè tou pou sèvi elèv yo.

Edvard M. Telasco, yon elèv nan Kolèj Teknik Dorsey di, "Anvan sa, nou te gen anviwon sèt (7) òdinatè, e kounye a nou gen plis pase 25. Sa pral ede nou anpil nan etid nou yo. Nou gen òdinatè 'MacBooks', yon pi bon koneksyon entènèt, epi anpil espas pou nou travay."

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM.

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, e sou Facebook nan MiamiSchools.