M-DCPS Fè Seremoni Lansman Pwojè pou Konstriksyon Nouvo Bilding Prensipal MAST @ FIU

Reprezantasyon nouvo bilding prensipal MAST@FIU, ki kòmanse konstwi lendi a.

“Miami-Dade County Public Schools (M-DCPS)” (Lekòl Leta Miami-Dade County) te fè yon seremoni lendi a, nan Marine Academy of Science and Technology (MAST) @ FIU, Biscayne Bay Campus, pou selebre yon pwojè $20.6 milyon pou konstwi nouvo bilding prensipal lekòl la.

Sipèentandan Lekòl yo, Dtè. Jose L. Dotres di, “Pandan n ap pran wout pou lavni, se kalite anviwonman sa yo nou vle ofri elèv nou yo ansanm ak kominote nou an, e pa gen anyen ki pi bon pase yon lekòl segondè ki ap travay ansanm avèk yon inivèsite tankou FIU… Sa se yon kanpous ekstrawòdinè paske li pap sèlman sèvi kòm salklas. Espas nou ap ajoute yo ofri yon pi bon opòtinite pou elèv aprann nan yon anviwònman ki vrèman espesyal. Se prèske tankou w te nan yon laboratwa.”

Anplis Dtè. Dotres, Manm Komisyon Konsèy Lekòl Joseph Geller, Direktè Sèvis Plan ak Konstriksyon Bilding Raul Perez, Ofisye Anchèf Kominikasyon Jacquelyn C. Diaz, Reprezantan Distri M-DCPS, Reprezantan Florida International University (FIU), Direktè MAST @ FIU Roberto E. Sarmiento, anplwaye lekòl la, ak elèv yo te patisipe nan evènman an tou.

Direktè MAST @ FIU, Roberto Sarmiento di, “Gras ak detèminasyon Distri a, nou pral genyen yon bilding anplis pou resevwa de fwa plis elèv ak anplwaye, e ki pral ofri plis espas toujou pou pwofesè nou yo, anplwaye nou yo, ansanm ak vizitè yo pou yo ka vin bonjan sitwayen global nan anviwònman yo.

Direktè Sèvis Plan ak Konstriksyon Bilding Raul Perez, Manm Komisyon Konsèy Lekòl Joseph Geller, Direktè MAST @ FIU Roberto E. Sarmiento, Sipèentandan Lekòl yo Dtè. Jose L. Dotres, Sipèentantan Rejyon Nò Dtè. Yesenia Aponte, Ofisye Anchèf Kominikasyon Jacquelyn C. Diaz, yo tout te patisipe nan evènman an.

Nouvo bilding 35,000 pye kare a pral gen ladan 20 salklas jeneral avèk apeprè 500 plas pou elèv, ansanm ak yon sal administrasyon, yon chanm anndan e youn sou deyò pou moun manje avèk yon kuizin espesyalize pou konsève e chofe manje, ak yon espas deyò pou moun manje.

Ap genyen tou yon nouvo pasaj pou pyeton aletaj, ki kouvri e ki konekte avèk bilding ki la kounye a, yon nouvo espas pou pakin avèk 36 plas, twotwa ak kloti, jaden byen amenaje ak tout sèvis modèn, ansanm ak yon wout ki pase sou bò sid etablisman an. Bilding nan ap ekipe tou avèk nouvo pano solè.

Se KAST Construction ki te resevwa kontra konstriksyon an, e konpayi achitekti Wolfberg Alvarez and Partners te komisyone pou egzekite pwojè sa a, nou estime ki ap fini ann out 2027.

Elèv yo kontan anpil pou nouvo posiblite yo ka deja ap imajine, kote yo pral genyen yon nouvo bilding ki ajoute sou kanpous yo a.

Mya Dorvil, yon elèv dènye ane lekòl segondè nan lekòl la di, “Nou pral genyen anpil opòtinite pou n devlope e aprann… MAST @ FIU ap fè gwo travay nan domèn aprantisaj pratik, nan pèmèt nou travay sou bagay nou pap jwenn nan liv. Nou ka soti deyò a, nou fè fize ak boutèy, e nou lanse yo. Nou teste nivo sèl ki nan pwent lanmè nou an. Kounye a nou ka monte nan yon lòt nivo avèk nouvo bilding sa a.”

Dorvil di li gen yon kouzen l ki te nan lekòl sa a lè li te fèt avèk trelè, san okenn bilding prensipal, e li di li vrèman enpresyone pou l ap asiste kalite transfòmasyon sa a nan lekòl li a.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM.

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, e sou Facebook nan MiamiSchools.