M-DCPS Lanse Pwogram Dantal ‘Big Smiles’ pou Bay Swen Dantè Gratis nan Andwa Lekòl yo e Amelyore Preparasyon Elèv

Elèv Lekòl Elemantè South Hialeah ap resevwa sèvis dantal atravè ‘Big Smiles’

Madi pase “Miami-Dade County Public Schools (M-DCPS)” (Lekòl Leta Miami-Dade County) selebre lansman Pwogram Dantal ‘Big Smiles’ nan Lekòl Elemantè South Hialeah. Pwogram nan pral bay elèv sèvis dantal gratis nan kèk lekòl Distri a chwazi.

Sipèentandan Lekòl yo Dtè. Jose L. Dotres di, “Pa gen pi bèl bagay nan mond la lè w ap gade yon timoun ki ap souri. Souri yon timoun, kèlkeswa timoun nan, jis amelyore jounen ou. Kounye a avèk ‘Big Smiles’, souri sa a vin pi bèl e pi gwo toujou. Nenpòt lè nou ka fasilite resous pou fanmi yo, tankou swen dantè, nou kreye meyè posibilite ak estrikti aprantisaj pou elèv nou yo. Sa se kle.”

Pami lòt moun ki te akonpanye Dtè. Dotres, te gen Manm Komisyon Konsèy Lekòl Danny Espino, Ko-Fondatè ak Vis Chèmann Egzekitif ‘Big Smiles Dental’ Dtè. Marcy Borofsky, reprezantan Distri yo, Direktè lekòl la, Dtè. Dillon M. Williams, anplwaye lekòl, pwofesè, ak elèv yo te rasanble pou selebre evènman an.

Plis pase 51 milyon lè prezans lekòl gaspiye chak ane akoz mank swen sante dantè; nan nenpòt moman done, ou jwenn 1 nan 7 timoun ki ap soufri ak maldan. Eta Florid la klase nan 50^èm pozisyon nan aksè dantal pou swen timoun defavorize. Pwogram ‘Big Smiles Dental’ la, ki ap travay e fè patenarya avèk 8,000 lekòl nan peyi a, resevwa elèv pou plis pase 10 milyon fwa nan espas 30 ane, e yo espere amelyore kriz sa a nan fè patenarya avèk M-DCPS.

Dtè. Borofsky di, “Dan gate se premye enfeksyon maladi kwonik timoun, li se premye bezwen nan sante timoun yo inyore, e avèk sa, timoun yo pa ka konsantre, aprann, oswa briye. Solisyon an se patenarya konsa avèk Lekòl Leta Miami-Dade County, ki pote swen dantè a kote timoun yo ye a.”

Nan foto a degoch adwat: Ofisye Anchèf Operasyon Luis E. Diaz, Direktè Lekòl South Hialeah Elementary Dtè. Dillon M. Williams, Manm Komisyon Konsèy Lekòl Danny Espino, Ko-Fondatè ak Vis Chèmann Egzekitif ‘Big Smiles Dental’ Dtè. Marcy Borofsky, Sipèentandan Lekòl yo Dtè. Jose L. Dotres antoure ak elèv lekòl South Hialeah Elementary.

Dtè. Borofsky di lè ekip Dantal ‘Big Smiles’ la vini nan yon lekòl, yo aranje yon klinik dantè mobil, ki ekipe avèk chèz dantal, atik esterilizasyon, ekipman pou asistan dantè, e sa ki pi enpòtan toujou, yon doktè dantis ak yon asistan dantis ki lisansye. E apre visit la, yo demonte e ranmanse tout ekipman yo pou ale bay elèv sèvis nan pwochen lekòl yo.

Akseswa yo sèvi pou edike elèv sou swen dantè nan klinik ‘Big Smiles’

Evelyn Delgado, ki se yon paran di, “Ide sa a fè m kontan anpil. Mwen pap bezwen pèdi yon jou travay ankò. Lefèt mwen oblije transpòte de (2) timoun nan vil la pou al pran swen dantè difisil anpil.’’ Se yon bon bagay pou gen pwogram konsa nan lekòl nou yo.”

‘Big Smiles Dental’ ap bay sèvis dantal nan andwa lekòl M-DCPS chwazi pou patisipe nan pwogram eksperimantal sa a. Pwogram nan ap retounen sis mwa apre premye vizit la pou kontinye tretman yo e pou resevwa nouvo pasyan.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oubyen Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, ak sou Facebook nan MiamiSchools.