Soti nan Lespas Rive sou Latè: M-DCPS Lanse "Open Seats" (Plas Disponib) pou Pwogram Magnèt ki Gen Anpil Demand

Poukisa pou w kontante w avèk yon salklas tradisyonèl lè ou ka pran fòmasyon nan yon konplèks espòtif ekstrawòdinè oubyen desine nouvo jenerasyon aparèy espasyal yo?

“Miami-Dade County Public Schools (M-DCPS)” (Lekòl Leta Miami-Dade County) ouvri ofisyèlman peryòd Aplikasyon pou “Open Seats” (Plas Disponib) nan Pwogram Magnèt li yo, ki ofri yon dezyèm chans pou elèv yo reklame yon plas pami kèk nan pwogram edikasyonèl ki pi inovatif e ki gen plis demand nan peyi a. Fanmi yo ka aji vit pou aplike pou nouvo plas ki disponib nan pwogram Magnèt ki ranpòte prim pou ane lekòl 2026-2027 la, paske plas yo ap ranpli sou baz moun ki vini anvan ap jwenn sèvis anvan.

Sipèentandan Lekòl yo, Dtè. Jose L. Dotres deklare, "Nou detèmine pou n asire nou chak elèv nan Miami-Dade gen aksè ak yon edikasyon klas mondyal, espesyalize ki reveye pasyon yo… Ke elèv sa a se yon fiti atis, yon fiti doktè, oubyen yon innovatè teknolojik, yo gen yon plas ki disponib pou yo."

Nouvo Fwontyè nan Aprantisaj

Ane sa a, M-DCPS ap entwodui pwogram dènye kri ki fèt pou redui eka ki genyen ant sa k ap fèt nan salklas yo ak ekonomi mondyal la:

·         SportsPLEX nan Miami Killian Senior High: Pwogram sa a ki pa sèlman konsantre sou sa k ap fèt sou teren jwèt la, ap fòme pwochen jenerasyon ajan òespòtif, patwon medya, ak innovatè nan syans espòtif, medsin, kominikasyon, ak teknoloji.

·         SpaceHUB @ Booker T. Washington Senior High ak SpaceHUB @ Hialeah-Miami Lakes Senior High: Lanse yon karyè nan direksyon lespas. Elèv yo resevwa eksperyans pratik nan endistri espasyal ak wobotik pou prepare yo pou endistri global sa a ki ap devlope rapidman.

·         Ekspansyon “International Baccalaureate (IB)” (Bakaloreya Entènasyonal) nan Frank C. Martin K-8: Louvri pòt kounye a pou Elèv Jadendanfan ka kòmanse eksperyans yo kòm fiti ekspè global atravè yon kourikoulòm yo rekonèt globalman ki ki itilize apwòch kesyònman lakay elèv.

Baze sou siksè nouvo pwogram nou te lanse ane pase yo, fanmi yo ka jwenn plas tou nan nouvo karyè espesyalize sa yo nou ouvri ane sa a:

·         The Iovine and Young Center (IYC) @ Miami Edison Senior High: Pwogram sa a ki melanje teknoloji, konsepsyon, ak antreprenarya, se yon potomitan ki kontinye ap defye apwòch tradisyonèl yo. IYC, ki fèt sou modèl akademi selèb USC a, ansanm ak vizyon lejand endistriyèl Jimmy Iovine ak Andre “Dr. Dre” Young, se meyè baz lansman pou pwochen jenerasyon innovatè yo.

·         DreCOMM @ Dr. Rolando Espinosa K-8 Center: Premye pwogram Magnèt Doral sa a redui eka ki genyen ant sa k ap fèt nan salklas yo ak medya yo. Elèv K-8 sa yo, ki lokalize nan yon sant medyatik global, metrize ladrès pou rakonte istwa yon fason pwofesyonèl ansanm ak medya dijital pou yo vin tounen lidè kominikasyon nan lavni.

·         RITMO @ Leisure City K-8 Center: Pwogram trè dinamik RITMO ‘Rhythms, Inspiration, Tradition, Music, Origins.’ Pwogram espesyalize sa a konsantre sou aspè mariachi, ki pèmèt elèv selebre eritaj mizikal yo pandan y ap devlope pèfòmans klas mondyal ak ladrès teknik.

·         Venetian Parc Academy: Redefini eksperyans elèv yo atravè yon apwòch pèsonalize ki baze sou metriz. Pandan l ap entegre teknoloji dènye kri ak zouti dijital entèraktif pou amelyore aprantisaj pèsonalize, li pral pèmèt elèv pwogrese nan pwòp vitès yo pandan y ap kiltive yon pèspektiv global ki rich e devlope ladrès yo bezwen pou lavni.

Fason pou W Sekirize yon Plas

Peryòd Plas Disponib nan Aplikasyon Magnèt la se yon lòt opòtinite pou fanmi yo eksplore yon edikasyon Magnèt ki espesyalize. Nou ka sekirize plas nou lè n ranpli Aplikasyon pou Plas Magnèt Disponib la sou entènèt. Paran yo ka konekte nan Pòtal Paran an atravè www3.dadeschools.net/ParentPortal ansuit, yo ka chwazi tit ‘Admissions Application’ pou yo ka kòmanse pwosesis aplikasyon an.

Chak pwogram Magnèt melanje divès pwogram akademik rijid avèk aprantisaj pratik nan yon anviwònman ki gen sekirite, ki sipèvize, e ki fèt pou prepare elèv yo pou kolèj, karyè, ak lavi.

Kèk Enfòmasyon Rapid pou Fanmi:

·         Disponiblite: Plas yo ap ranpli sou baz moun ki vini anvan ap jwenn sèvis anvan.

·         Pri: Tout pwogram Magnèt M-DCPS yo gratis.

·         Tem: Eksplore 11 diferan domèn etid, tankou STEM, Ar Rafine, Syans Sante, ak Komès & Endistri.

·         Fason pou W Aplike: Sèlman sou entènèt atravè www3.dadeschools.net/ParentPortal

Avèk yon istwa ekselans ki dokimante, chwa edikasyonèl san parèy, inovasyon ki resevwa rekonesans nasyonal, ansanm ak yon angajman solid pou sekirite, Lekòl Leta Miami-Dade County se pi bon chwa ou. Pou yon lis konplè pwogram ki disponib yo e pou eksplore 11 tèm etid yo, paran yo ka vizite tou miamimagnèts.org.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools.