M-DCPS Inogire yon Espas Inovasyon Dènye Kri nan Ponce de Leon Middle School

Elèv Ponce de Leon Middle School ki ap jwe yon jwèt sou planche entèraktif ki nan nouvo espas inovasyon lekòl la.

“Miami-Dade County Public Schools (M-DCPS)” (Lekòl Leta Miami-Dade County) inogire yon espas inovasyon reamenaje, ki rich an teknoloji nan Ponce de Leon Middle School. Nouvo espas la gen ladan yon planche entèraktif ak nouvo mèb nan yon zòn ki ouvè kote elèv kapab angaje yo nan aktivite kreyatif an gwoup.

Angela C. Gonzalez, Direktris Ponce de Leon Middle School di, “Ide inovasyon sa a baze sou pwogrè, evolisyon, e li kreye yon espas kote timoun yo anvi vin aprann, fè lekti, amize yo, e vrèman angaje yo nan aprantisaj, kourikoulòm, avèk pwofesè yo.” Daprè Madam Gonzalez, nouvo espas la pwovoke kontantman lakay elèv yo konsènan fè lekti liv, pa sèlman nan angaje yo nan teknoloji.

Anplis Direktris Gonzalez, seremoni inogirasyon an te gen ladan Asistan Sipèentandan Depatman ‘School Choice and Parental Options’ Daniel Mateo, Chèmann Komisyon Konsèy Lekòl la Mari Tere Rojas, Direktè Egzekitif ‘College Football Playoff Foundation’ Britton Banowsky, ak anplwaye lekòl la, pwofesè, ak elèv. Yo tout te patisipe nan selebrasyon an.

Espas inovatif la gen yon zòn ki ouvè pou ar ak atizaj, ak pou elèv yo fè teknoloji pratik, jwèt sou tablo, ak yon planche entèraktif kote elèv yo ka eksplore epi amize yo nan divès aktivite ak jwèt edikatif yo jwe ak pye yo.

Nouvo sant medya reamenaje a gen ladan nouvo mèb modilè ki konfòtab pou elèv yo ka pase tan yo epi yon espas ki ka sèvi pou plizyè itilizasyon, ansanm ak plizyè gwo tab wo nan modèl tab achitèk ak chèz, kote elèv yo ka sèvi ak òdinatè pòtab yo pou etidye, fè pwojè kreyatif nan klas, ak pou jwe jwèt.

Leylani Berlanga, yon elèv klas uityèm ane deklare, “Elèv yo gen anpil opòtinite pou yo aprann plis avèk anpil pratik dirèk…Se yon pi bon anviwònman pou aprann paske li bèl epi li konfòtab. Mwen renmen koulè yo, kanape yo, jwèt yo, epi mwen kontan anpil pou mwen la avèk zanmi m yo pou nou amize nou nan espas sa a.”

Sant reamenaje a gen ladan nouvo etajè pou liv, ansanm ak tab pliyant ki kapab sèvi pou ansèyman nan klas epi apre sa ki ka fèmen rapidman ak efikasman lè yo pap itilize, ki ede kenbe yon espas ouvè pou lòt aktivite.

Sou bò gòch la, gen yon ekspozisyon travay atistik elèv yo;

epi sou bò dwat la, yon elèv ap sèvi ak youn nan pwototip wobotik yo.

Paran yo vrèman enpresyone ak diferans ki genyen ant ansyen bibliyotèk la ak nouvo espas modèn sa a, ki se yon melanj ant bibliyotèk ak espas jwèt teknoloji wo nivo.

Roxana Rassi, Prezidan Asosyasyon Paran, Pwofesè ak Elèv yo, di “Li vrèman modèn, se yon espas ki enteresan pou elèv yo vini ladan l, epi pou pwofesè yo òganize klas, aktivite, ak gwoup etid.” Li te remake tou ansyen sant medya a te fèmen anvan, ki fè elèv yo pa t gen kote pou yo reyini. Li di, “Klib tankou klib teyat ak wobotik pral sèvi ak espas la tou.”

Inisyativ sa a, ki vize kreye 18 espas inovatif pou elèv lekòl mwayen yo nan yon peryòd de (2) ane, ap benefisye de yon patenarya 2 milyon dola ant M-DCPS, ‘College Football Playoff Foundation’, Komite Akèy Miami 2026 la, ak ‘Orange Bowl Committee’.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools.