M-DCPS Inogire yon Espas Inovasyon Dènye Kri nan Lekòl Everglades K-8 Center

Elèv Everglades K-8 Center ki ap jwe yon jwèt sou Planche Entèraktif ki nan nouvo espas inovasyon lekòl la.

“Miami-Dade County Public Schools (M-DCPS)” (Lekòl Leta Miami-Dade County) inogire yon Espas Inovasyon reamenaje, ki rich ak teknoloji nan Everglades K-8 Center. Nouvo espas la gen ladan yon planche entèraktif ak nouvo mèb nan yon zòn ki ouvè kote elèv kapab angaje yo nan aktivite kreyatif an gwoup.

Sipèentandan Lekòl yo, Dtè. Jose L. Dotres di, “Avèk espas inovasyon sa a, ou ka devlope kè kontan grasa patisipasyon ou ak tout teknoloji yo… Ou ka bati yon kominote isit la paske sa se yon espas ouvè pou kolaborasyon. Devlope pasyon ou, paske se egzakteman sa inovasyon dwe fè.”

Anplis Dtè. Dotres, seremoni koupe riban an te gen ladan Direktè Lekòl Everglades K-8 Center a, Mesye Daniel Diaz, Direktris Anchèf Depatman Akademik la, Madan Lourdes Diaz, Direktè Resous Imèn, Dtè. Dawn Baglos, Vis-Chèman Komisyon Konsèy Lekòl la, Madan Monica M. Colucci, Direktè Egzekitif Fondasyon 'College Football Playoff' la, Mesye Britton Banowsky, ekip 'K-9' Sosyo-Emosyonnèl Polis Lekòl Miami-Dade la, ansanm ak anplwaye lekòl la, pwofesè ak elèv ki te patisipe nan selebrasyon an.

Espas inovatif la gen yon zòn ki ouvè pou ar ak atizaj, ak pou elèv yo fè aktivite teknoloji pratik, jwèt sou tablo, ak yon planche entèraktif kote elèv yo ka eksplore epi amize yo nan divès aktivite ak jwèt edikatif yo jwe ak pye yo. 'The Education Fund Ocean Bank' Sant pou Materyèl Edikatif te fè donasyon plizyè seri Lego tou, materyèl pou ar ak atizay, jwèt dam ak echèk, ansanm ak lòt aktivite amizan pou elèv yo chwazi.

Genyen tou yon estidyo pou difizyon ak kamera ak ekipman pou 'podcast', ansanm ak nouvo tab ak chèz òdinatè. Yo te fè sa a yon fason pou sipòte yon nouvo kou sou pwodiksyon televizyon yo ofri kounye a kòm yon opsyon nan lekòl mwayen an.

Daniel Diaz, Direktè lekòl la di, “Espas inovasyon sa a reprezante plis pase yon transfòmasyon fizik. Li reflete yon mantalite, yon konviksyon pou kreye yon anviwònman kote elèv yo ka kolabore, panse klèman, eksplore avèk kouraj, epi fè imajinasyon yo vin tounen reyalite.”

Nouvo sant medya reamenaje a gen ladan nouvo mèb modilè ki konfòtab pou elèv yo ka pase tan yo epi yon espas ki ka sèvi pou plizyè itilizasyon, ansanm ak plizyè gwo tab wo nan modèl tab achitèk ak chèz, kote elèv yo ka sèvi ak òdinatè pòtab yo pou etidye, fè pwojè kreyatif nan klas, ak pou jwe jwèt.

Zòn nan ekipe tou ak tab pliyant yo ka mete youn sou lòt, e ki ka itilize pou ansèyman nan salklas e ansuit estoke rapidman e efikasman lè yo pap itilize yo, ki ogmante itilizasyon espas la epi kenbe li disponib pou lòt aktivite.

Elèv yo nan zòn lekti espas inovasyon an ansanm ak Direktè Daniel Diaz, Ofisye Richard Praschnik, ak 'K-9' Mayo.

Rey Garcia, yon elèv uityèm ane nan lekòl la, di, “Mwen pa santi tankou se yon bibliyotèk ankò sèlman, se yon espas kote elèv yo ka pran plezi epi pran yon repo nan tout aktivite estrès lekòl la, e mwen panse sa se vrèman yon bon bagay. Lè nou ap jere plizyè klas ak devwa, yon espas konsa enpòtan anpil pou nou pa twòp bouskile.”

Inisyativ sa a, ki ap kreye 18 espas inovasyon pou lekòl mwayen nan twazan, te resevwa yon finansman $2 milyon gras ak yon patenarya ant M-DCPS, ‘College Football Playoff Foundation’ ak Komite Planifikasyon Chanpyona Nasyonal ‘College Football Playoff’, ak Komite 'Orange Bowl' la. Rive nan sezon otòn nan, pral gen 38 espas inovasyon ki ap fonksyone nan kanpous lekòl M-DCPS yo.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oubyen Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools.