M-DCPS Ap Ofri Manje Maten ak Manje Midi Gratis nan Lekòl ki Kalifye yo Elèv ki Elijib yo Ap Toujou Resevwa Manje Gratis Oswa Nan Pri Redui Nan Tout Lekòl Yo

Daprè nouvo gid sou pri manje pou Pwogram Nasyonal Manje Midi nan Lekòl ak Pwogram Manje Maten nan Lekòl pou pwochen ane lekòl la nan “Miami-Dade County Public Schools (M-DCPS)” (Lekòl Leta Miami-Dade County), apeprè 121 lekòl ap kontinye ofri manje maten ak manje midi gratis. Elèv ki nan tout lòt lekòl yo ap bezwen ranpli yon aplikasyon pou kalifye pou resevwa manje gratis oswa nan pri redui.

Apre fen patisipasyon Distri a pandan kat (4) dènye ane pase yo nan pwogram federal "Community Eligibility Provision (CEP)" (Pwovizyon sou Kalifikasyon Kominotè), nouvo done federal sou kalifikasyon yo montre M-DCPS pa kalifye ankò pou ofri manje maten ak manje midi gratis pou tout elèv nan tout distri a.

Mesye Luis E. Diaz, Ofisye Anchèf Operasyon nan Lekòl Leta Miami-Dade County di, "Objektif nou se pwoteje fanmi yo kont nenpòt difikilte pandan n ap kenbe disponib pwogram manje maten ak manje midi a gratis pou majorite elèv jan sa posib. Nou ap lanse yon kanpay sansibilizasyon pou asire fanmi yo resevwa enfòmasyon ki klè e konplè, etap pa etap."

Lekòl ki satisfè kondisyon 'CEP' yo ap resevwa toude manje maten and manje midi gratis pou tout elèv nan 121 lekòl yo.

Men pri pou Lekòl ki pa Kalifye pou pwogram manje gratis la (Lekòl ki pa fè pati pwogram CEP a)

Lekòl Elemantè ak Sant K-8 yo

·         Dejene Gratis

·         Pri nòmal pou manje midi se $4.20, pri redui a se $0.40 santim

Lekòl Mwayen ak Lekòl Segondè

·         Pri nòmal pou manje maten se $2.50, pri redui a se $0.30 santim

·         Pri nòmal pou manje midi se $4.20, pri redui a se $0.40 santim

Elèv ki prale nan lekòl ki pa kalifye pou benefis pwogram manje gratis (lekòl ki pa fè pati pwogram CEP a) ap bezwen kalifye atravè pwosesis aplikasyon federal la. Yo ka kòmanse pwosesis aplikasyon an nan dat 10 out atravè lyen sa a: mdcpsnutrition.net Elèv ki deja sètifye dirèkteman atravè pwogram tankou 'SNAP', 'TANF', 'Medicaid', 'foster care' (sèvis pou timoun k ap viv avèk yon fanmi dakèy), 'Head Start', sèvis pou migran, oswa èd pou moun ki sanzabri, ap kontinye resevwa manje gratis otomatikman. Tout elèv yo ap resevwa manje gratis pandan 30 premye jou ane lekòl la oswa jiskaske yo detèmine kondisyon kalifikasyon yo.

Chak repa Depatman Manje ak Nitrisyon sèvi kreye pou sipòte sante, byennèt, ak siksè akademik elèv yo. Lekòl yo ap travay dirèkteman avèk fanmi yo pou ede yo konprann kondisyon kalifikasyon yo, pou ede yo navige pwosesis aplikasyon an, epi jwenn benefis ki disponib. Nou ankouraje fanmi yo pou soumèt aplikasyon yo pi bonè posib pou evite entèripsyon nan benefis yo.

Lekòl Leta Miami-Dade County rete angaje nan misyon li pou sipòte chak elèv ak chak fanmi. Malgre kondisyon pwogram federal yo chanje, angajman Distri a pou ekselans, chwa, inovasyon, sekirite, ak byennèt elèv yo pa chanje.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. Silvouplè telechaje aplikasyon mobil Dadeschools la sou aparèy iPhone oubyen Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, a sou Facebook nan MiamiSchools.