M-DCPS Òganize Seremoni Koupe Riban pou yon Nouvo Laboratwa Asistan Medikal nan South Miami Senior High School an Patenarya avèk South Dade Technical College

Elèv nan Lekòl Segondè South Miami ki enskri nan Pwogram Anwolman Doub Asistan Medikal la ap teste aparèy nan nouvo laboratwa yo a 

Lendi a, "Miami-Dade County Public Schools (M-DCPS)" (Lekòl Leta Miami-Dade County) te òganize yon seremoni koupe riban pou selebre lansman Laboratwa Pwogram Anwolman Doub Karyè Asistan Medikal nan Lekòl Segondè South Miami, an patenarya avèk Kolèj Teknik South Dade la.

Pwogram sa a pèmèt elèv yo jwenn sètifikasyon endistriyèl epi devlope eksperyans pratik nan domèn asistans medikal pandan yo toujou nan lekòl segondè.

René Mantilla, Asistan Sipèentandan pou Biwo Edikasyon Aprè Lekòl Segondè, Karyè ak Edikasyon Teknik di, "Nou fyè anpil dèske nou te kapab pote konesans ak ekspètiz endistri Kolèj Teknik South Dade la bay elèv Pwogram Asistan Medikal nan Pwogram Anwolman Doub Karyè nan Lekòl Segondè South Miami an. Patenarya sa a pral bay elèv sa yo konpetans ak opòtinite pou yo sètifye epi travay nan domèn swen sante, yon sektè ki pa sèlman gen gwo demann, men ki esansyèl tou pou kominote nou an."

Anplis Mesye Mantilla, Chèman Komisyon Konsèy Lekòl la Madan Mari Tere Rojas, Sipèentandan Rejyon Sant la Madan Brenda Swain, reprezantan ki soti nan Distri M-DCPS yo, Direktè Kolèj Teknik South Dade la Madan Llennery Pena, Direktè Lekòl Segondè South Miami a, Mesye Herbert Penton, anplwaye lekòl la ak elèv yo te patisipe nan evènman an.

Kourikoulòm Pwogram Anwolman Doub Karyè Asistan Medikal la ofri fòmasyon nan pwosedi klinik, fonksyon administratif nan swen sante, pratik asistan medikal, ansanm ak fòmasyon sou ekipman medikal modèn.

Direktè Penton di, "Atravè patenarya sa a avèk Kolèj Teknik South Dade la, nou fyè pou nou ouvri nouvo chemen karyè nan domèn swen sante pou elèv nou yo. Pwogram sa a pral ba yo eksperyans reyèl nan mond travay la, aksè a yon endistri ki gen anpil demann, ak sètifikasyon pwofesyonèl ki prepare elèv yo pou antre nan mache travay la pandan yo toujou nan lekòl segondè."

Klinik la ak salklas la, ki fè pati nouvo Laboratwa Asistan Medikal nan Lekòl Segondè South Mami an. 

Lè ane lekòl la kòmanse, anviwon 80 elèv pral enskri nan Pwogram Asistan Medikal la. Soti premye ane jiska dènye ane lekòl segondè, elèv yo ap pran kou espesyalize chak trimès ki konsantre sou asistans medikal. Elèv yo pral fè eksperyans aprantisaj pratik sou konpetans reyèl tankou pran siy vital pasyan, pran san, fè "electrocardiograms (EKGs)" (elektwokadyogram), bay piki ak medikaman, epi ede doktè lè yo gen pwosedi medikal avanse.

Madan Griselle Torres, pwofesè anseyan pwogram asistans medikal nan Kolèj Teknik South Dade la, ki gen plis pase trant (30) ane eksperyans nan domèn nan di, "Ane pase nou pa t gen bèl laboratwa sa a. Kounye a elèv yo kapab fè pwosedi pratik nan domèn asistans medikal tankou retire pansman, pran swen yon moun ki boule ak blese, epi mezire siy vital yo. Yo kapab mete an pratik sa yo ap etidye ak aprann yo."

Rive nan fen ane lekòl la, elèv yo pral pran egzamen eta a pou yo jwenn sètifikasyon yo kòm asistan medikal. Apre sa, y ap pare pou yo travay kòm asistan medikal.

Enzo Ramirez, yon elèv ki pral rantre nan dezyèm ane lekòl segondè e ki ap patisipe nan pwogram nan di, "Anvan sa, nou te fè plis teyori. Men kounye a nou pral aprann pou nou pran san, sèvi ak yon estetoskòp, epi mezire tansyon. Sa vle di aprann pandan w ap fè travay la olye de aprann teyori sèlman.”

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM.

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @SuptDotres, sou Instagram nan @MiamiSchools ak @SuptDotres, e sou Facebook nan MiamiSchools.