M-DCPS Anonse Ouvèti Aplikasyon Magnet ak VPK pou Ane Lekòl 2027–2028 la

“Miami-Dade County Public Schools (M-DCPS)” (Lekòl Leta Miami-Dade County) ap redefini sa ki posib nan edikasyon piblik pandan l ap ouvri ofisyèlman aplikasyon pou pwogram Magnet distenge ak “Voluntary Prekindergarten (VPK)” (Pwogram Klas Matènèl Volontè) li yo pou ane lekòl 2027–2028 la, 1ye oktòb.

Gen yon gran varyete posiblite ki ap tann nou!

M-DCPS kontinye ap elaji òf li yo, pandan l ap pèmèt elèv yo deklannche kiryozite yo, eksplore pasyon yo, e trase pwòp chemen yo endividyèlman pou yo ka fè siksè alavni, atravè chwa edikasyonèl dènye kri, e ekolaj gratis nou ofri yo.

Kòm yon aspè nan varyete chwa inovatif li yo ki kontinye ap elaji, M-DCPS ap prezante plizyè pwogram enteresan ki disponib pou ane lekòl ki ap vini an. Paran yo ka aplike pou nouvo pwogram ‘SportsPLEX’ la nan Miami Killian Senior High, pwogram SpaceHUB la nan Booker T. Washington Senior High ak Hialeah-Miami Lakes Senior High, nouvo pwogram Magnet Akademi Klasik la nan Green Elementary, ansanm ak pwogram Ar Kilinè nan Riviera Middle School la ansanm ak pwogram Enfòmatik la nan Lamar Louise Curry Middle School. Opòtinite sa yo vin ajoute sou plis pase 300 pwogram Magnet ki disponib atravè distri a nan domèn tankou ar, syans, teknoloji, ak pwofesyon teknik.

Pou asire yon pwosesis enskripsyon san difikilte, M-DCPS etabli bonjan enstriksyon pou aplikasyon yo, selon nivo klas ak kalite pwogram elèv yo ap aplike pou li a.

Tout aplikasyon pou pwogram Magnet, soti nan Jadendanfan rive nan 12èm ane, dwe fèt sou entènèt sèlman atravè Pòtal Paran M-DCPS la, nan dadeschools.net. Paran yo ka konekte fasilman lè yo itilize Idantifikasyon ‘Apple’ oswa ‘Google’ yo epi seleksyone etikèt ‘Admissions Application’ pou yo aplike.

Pou pwogram VPK nou yo, aplikasyon yo ap ouvri sou entènèt tou 1ye oktòb atravè Pòtal Paran M-DCPS la pou senk pwogram espesyalize “Voluntary Prekindergarten (VPK)”  (Pwogram Klas Matènèl Volontè) M-DCPS yo, ansanm ak apeprè 16 andwa lekòl VPK adisyonèl ki ap gen admisyon sou fòm lotri. Paran ki ap eseye enskri nan pwogram VPK espesifik sa yo dwe ranpli aplikasyon VPK a sou entènèt atravè Pòtal Paran an. jeneralman sou baz moun ki vini anvan an ap jwenn sèvis anvan, nan lekòl ki ap patisipe yo, donk nou ankouraje paran yo aplike bonè.  

Kòm twazyèm pi gwo distri lekòl nan peyi a e yon lidè nan chwa lekòl, inovasyon, ak siksè elèv, M-DCPS rete meyè chwa pou yon edikasyon piblik klas mondyal.

Eksperyans Edikasyonèl Pitit Ou a Ap Tann Li!  

Aplikasyon Magnet ak VPK yo vin melanje ak aplikasyon pou pwogram Chwa ki ap fèt nan M-DCPS pandan tout ane a, pou asire fanmi yo gen aksè ak diferan opsyon pou eksplore pwogram espesyalize yo. M-DCPS pran angajman pou l elaji aksè ak pwogram bon kalite, espesyalize, ki ofri plis chwa edikasyonèl pase toutan. Lekòl Magnet inovatif nou yo detèmine pou yo enspire, angaje, e prepare elèv yo pou yon avni ki reyisi.

Plas ou ap tann ou! Pou eksplore katalòg konplè pou pwogram yo oswa pou jwenn yon gid etap pa etap pou aplikasyon an, vizite miamimagnets.org.

Pou plis èd oswa enfòmasyon, tanpri kontakte ‘Office of School Choice and Parental Options’ nan 305-341-0999.

Pou dènye enfòmasyon yo an Kreyòl, silvouplè branche sou Radyo Lekòl lendi - vandredi a 9è diswa sou WLRN 91.3 FM, ak mèkredi 10:30 dimaten sou WSRF 1580AM, e 6è diswa sou RCH 23 1610AM. 

Silvouplè telechaje Aplikasyon Mobil Dadeschools la sou aparèy iPhone oswa Android ou. Suiv nou sou X nan @MDCPS ak @MiamiSupt, sou Instagram nan @MiamiSchools ak @MiamiSupt, ak sou Facebook nan @MiamiSchools ak @MiamiSupt.